Shillong bhi gaye, Tenga valley sey bhi gaye, aur kal Guruparab tha.
Main aur mere pati Vizag ke Gurudware gaye the.
Gate ke paas pahunchte hi unhe manager ka call aa gaya —
kisi colleague ka number share karna tha.
Hum car side mein park karke baith gaye.
Wo apne phone mein the,
aur main… apne khayalon mein kho gayi.

Car ke andar baith kar mujhe wo purana din yaad aaya —
jab maine Etu ko dhoondh nikala tha.
Mujhe khud nahi pata tha kaise,
par maine ek Gurudware mein call kiya
aur saamne se ek narm awaaz aayi —
“Hanji, aapki behen yahi hai, lo baat kar lo.”

Us pal laga, Babe di mehar —
kuch connections Rab khud likhta hai,
jo samajh se pare hote hain, par dil se jude hote hain.

Kal bhi, Gurudware ke bahar baithi thi,
dil mein ek hi ardaas chal rahi thi —
“Mere Rabba, kuch aisa chamatkaar kar de,
meri godh bhar de jaise us din tune mujhe Etu se milwaya tha.”

Main har dar pe gayi hoon,
har matha tek kar sirf yahi kaha hai —
“Mujhe prove karna hai Rabba,
main koi kami nahi hoon,
meri maa-baap ne koi kharab tukda nahi banaya.”

Maine waada kiya hai —
ek din Harmindar Sahib aaungi,
apni aulaad ko haathon mein lekar.

Kahan kahan nahi maangi maine mannat,
bas ab tu meri sunn le Rabba…
ek baar, sirf ek baar.

✨ Reflection

Kabhi kabhi humari sabse gehri prarthna,
sabse shant pal mein likhi jaati hai —
jab hum bolte nahi, bas mehsoos karte hain.
Aur shayad wahi pal hota hai,
jab Rab humare dil ke lafz sun leta hai.